UN Yaungana Kuwadhibiti Islamic State (IS)

Wanajeshi na polisi wamekuwa wakishika doria maeneo mengi Ufaransa

Baraza la Usalama la Umoja wa Mataifa limepitisha kwa kauli moja azimio la kuzidisha juhudi za kukabiliana na Islamic State, baada ya mashambulio ya Paris wiki iliyopita.

Azimio hilo lililotayarshwa na Ufaransa linahimiza mataifa yote wanachama wa UN “kuchukua hatua zote zifaazo” kukabiliana na IS.

Kundi la IS lilisema lilihusika kwenye mashambulio hayo ya Paris yaliyosababisha vifo vya watu 130.
Aidha, lilidai kuhusika katika kulipua mabomu Lebanon mwezi huu. Awali, lilikuwa limesema lilihusika kudungua ndege ya Urusi eneo la Sinai mwezi Oktoba, na kuua watu 224.
Azimio hilo la UN nambari 2249 linashutumu mashambulio ya hivi majuzi Sousse, Tunisia, na Ankara, Uturuki

Mgahawa wa Carillon ni miongoni mwa maeneo yaliyoshambulia Paris, na hapa maua yanaonekana kwenye shimo lililotobolewa na risasi

Hatua hiyo ilichukuliwa huku maafisa nchini Ubelgiji wakitangaza kiwango cha juu zaidi cha tahadhari Brussels, na kuonya huenda kukatokea shambulio.
Baadhi ya walioshambulia Paris walikuwa wamekaa Brussels. Manusura pekee wa kundi hilo, Salah Abdeslam, bado anasakwa na anadaiwa kurejea humo.
Serikali ya Ubelgiji imesema mshukiwa mwingine ameshtakiwa kuhusiana na mashambuliano hayo, na kufikisha idadi ya walioshtakiwa nchini humo hadi watatu.

Usalama umeimarishwa nchini Ufaransa

Baraza la Usalama la UN liliyataka mataifa wanachama kuangamiza “maeneo salama” ya IS na wapiganaji wengine ambayo yameundwa Iraq na Syria.
Azimio hilo pia linasisitiza kwamba mataifa yanafaa “kuongeza maradufu na kuendesha juhudi za kuzuia na kukabili mashambulio ya kigaidi kwa pamoja”.
Hata hivyo, haijagusa Sura VII ya UN ambayo huidhinisha kutumiwa kwa nguvu.
Ufaransa na Urusi zilisema tayari inaruhusiwa kutumia nguvu kwa sababu mataifa yana haki ya kujilinda.
Awali, maafisa wa Ufaransa walisema binamu wa mhusika mkuu wa mashambulio hayo ya Novemba 13 mjini Paris hakujilipua wakati wa operesheni ya polisi Saint Denis kama ilivyodhaniwa awali.

Share on Google Plus

About Dady

This is a short description in the author block about the author. You edit it by entering text in the "Biographical Info" field in the user admin panel.